Var enginn í brúnni á Wilson Muuga?

Í MORGUNBLAÐINU 16. janúar síðastliðinn birtist grein eftir Oddberg Eiríksson, skipasmið, undir fyrirsögninni "Hinsta för Wilson Muuga". Greinin er með skáldlegu ívafi, og segir þar meðal annars, "Ugglaust hefur skipið verið sjófært, það er að segja innan hafnargarða, en haffært var það ekki til siglinga um norðurhöf að vetrarlagi". Það rétta er, að þetta skip hefur verið í föstum ferðum allan ársins hring um mörg undanfarin ár, með hráefni til Járnblendiverksmiðjunnar, og alltaf siglt til baka galtómt eins og í þetta sinn. Oddbergur segir ferðinni hafa verið heitið til Murmansk, en frá Hvalfirði til Murmansk var venjulega farið norður fyrir land, en Wilson Muuga var haldið suður fyrir, þrátt fyrir mjög slæmt veðurútlit á þeim slóðum. Væntanlega hefur Oddbergur úr fréttum, að skipið hafi farið fyrir Garðskaga í einnar sjómílu fjarlægð. Við góð skilyrði fara vélbátar þar ekki nær en 1,3 til 1,5 sjómílur, en annars eftir veðri 2 til 3 mílur undan. Wilson Muuga hefði því í það minnsta átt að vera 3 mílur undan Garðskaga þar sem hvasst álandsveður var. Svo virðist sem sjálfstýringin ein og sér hafi verið látin sjá um siglingu skipsins þrátt fyrir það, sem fram hefur komið í fréttum, að hún væri gallagripur. Hafi nokkur maður verið í brúnni hefur ekkert verið litið eftir tækjum eða til lands.

Oddbergur hvetur til umræðu um þetta furðulega ferðalag skipsins, og get ég vel tekið undir það.

Í fréttum hefur komið fram, að í tvö ár hafi nefnd verið að "störfum" við að semja reglur um siglingar olíuskipa hér við land. Að undanförnu hafa þeir verið að velta fyrir sér tillögum norskra "sérfræðinga" um að beina umferð slíkra skipa út fyrir Eldeyjarsker, Geirfuglasker. Þurfi nefndin að velta fyrir sér slíkri vitleysu þá virðist mér enginn í henni hafa kunnáttu til að fjalla um þessi mál. Ég álít að skipa ætti nýja nefnd kunnáttumanna, og gefa þeim einn mánuð til að ljúka verkinu. Það þykir sjálfsagt að hafa umsjón með flugi í íslenskri lofthelgi og að nokkru hefur Tilkynningaskyldan umsjón með skipaferðum. Vel mætti hugsa sér að Tilkynningarskyldan tæki að sér að leiðbeina stórum skipum strax og þau koma að 12 mílna mörkunum við Ísland.

Höfundur er skipstjóri.

Athugasemdir

[Magnús Jónsson, 5.4.2007 kl. 20:38]

Orð í tíma töluð hjá þér, mér finnst það skelfileg tilhugsun að skipum af þessari stærð sé siglt um fiskimið smábáta nær eftirlitslaust, og ef satt er undir sjálfstýringu einn saman, tek heilshugar undir með þér að nefndarseta í 2 ár um svona mál nær engri átt, málið þolir ekki slíkan lappadrátt, mig undrar reyndar þær hugmyndir að lát skip sigla hálfa leið til grænlands ef fara á fyrir reykjanes, sé ekki skinsemina í slíku enda sennilegast hugmynd mana sem lítið vita um hvað er verið að ræða.Kveðja Magnús